Mir hei Ferie ds Schottland gmacht.
Areisetag
Am Mittwuch, der 15. Mai heisäch 9 vo üsne Landjügeler ufe Wäg id Ferie gmacht. Womer am Flughafe alli gfunde hei gha, isches dürd Sicherheitskontrolle gange u mir hei mitem erste Aperol uf di Ferie agstosse.
Die längi Wartezyt ufe Flug heimer mit 11 (hei nid alli gwüsst, dasmer nume ds nünt reise) Glacene überbrückt u womer du ändli ds Edinburgh im Hotel si acho, heimernis grad ufd Seuchi nachemne Znacht und em erste Pub gmacht.
2. Tag
Am zwöite Tag het üs üse Fahrer für die bevorstehendi Rundreis abgholt u mir hei üs ufe Wäg gmacht zum Stirling Castle. Nachere spannende Füehrig wo die einte chli meh u die andere chli weniger verstande hei, simer scho ume witer.
Mir si der grösst See vo Schottland ds Loch Lomond vo verschiedene Ussichtspünkt us ga beguetachte. Vom erste Ussichtspunkt us hets no chli wie der Thunersee usgseh, aber mit jedem witere Stopp hets geng wie meh nach däm Schottland usgseh wo mir üs vorgstellt hei.
Nach dene vile nöie Idrück het üs üse Fahrer bim doch eher abglägnigere Hotel abglade u mir hei der Abe mit Znacht u ir Hotelbar la usklinge.
|
|
3. Tag
Der dritt Tag hei mir mitere länge Panoramfahrt mit mehrere Zwüschestopps dürd Highlands gstartet. Die einte hei chli meh u die andere chli weniger vor Ussicht mitbecho.
Nach langer Fahrt simer bim Eilean Donan Castle acho.
Nachder Besichtigung u äre Portion Fish & Chips hei mir üs scho ufe Wäg gmacht zum nächschte Hotel. Nach länger Fahrt womer sogar no am Loch Ness entlang gfahre si, simer ds Aviemore im Hotel acho. Nachem acho heimernis natürli grad ufd Suechi nachemne guete Pub gmacht.
4. Tag
Am letschte Tag vo üsere Rundreis si mir am Morge no äs dritts u letschts Castle ga aluege. Es hetsäch zimläch vo de andere zwöi Castle womer bis itze hei gluegt, unterschide u isch sehr beidruckend gsi.
Am Namittag si mir no ä chlini Destillerie ir nöchi ga aluege. Mir hei glehrt wie Whiskey härgstellt wird u hei sogar ä 12jährige dörfe probiere. Die einte heine besser gfunde als die andere.
Nach dere Kostprob hei mir üs wieder ufe Wäg nach Edinburgh gmacht, wo mir am früeche Abe si itroffe. Nachem Ichecke im Hotel si die letschte Souvenirs gkouft worde, die letschte Pubs bsuecht worde u es isch sogar no ä Pyjamaparty verastaltet worde.
Heireisetag
Am Sunntigmorge hei mir üs alli mit viune nöie Idrück ufe Heiwäg gmacht u si froh gsi womer wieder Schwizerbode unter de Füess hei gha.
Mir wärde no viu a di super 5 Täg wo mir zäme ds Schottland hei verbracht, zrügg dänke u fröie üs alli scho uf die nächschti Reis.